O colexio Salesianos A Coruña celebrou unha nova edición da súa Feira Académico-Profesional, unha iniciativa dirixida ao alumnado co obxectivo de achegarlles diferentes itinerarios formativos e saídas profesionais para o seu futuro. Ao longo da xornada, os estudantes puideron percorrer os distintos stands informativos, coñecer a oferta educativa de cada institución e resolver dúbidas de maneira directa cos profesionais convidados.
Nesta edición participaron diversas entidades e centros formativos que presentaron as súas propostas académicas e profesionais. Entre elas, a Policía Nacional, a Universidade Intercontinental da Empresa, a Escola Superior Marcelo Macías, o Centro Universitario de Tecnoloxía e Arte Dixital (U-tad), Atlantic Air Academy, Air Hostess, a Universidade Europea, a Universidade de Navarra e a Universidade da Coruña. Cada unha destas institucións compartiu co alumnado información sobre os seus estudos, requisitos de acceso e oportunidades laborais.
A feira permitiu ao alumnado descubrir novas opcións, coñecer de primeira man distintos ámbitos profesionais e reflexionar sobre os seus intereses persoais e académicos. Ademais, os estudantes puideron formular preguntas concretas sobre graos universitarios, formación profesional, estudos especializados ou saídas profesionais, o que favoreceu unha orientación máis próxima e personalizada.
Con esta actividade, o centro reforza o seu compromiso coa orientación académico-profesional do alumnado, acompañándoos nun momento clave de toma de decisións. A Feira Académico-Profesional consolídase así como unha oportunidade para abrir horizontes, motivar ao alumnado e axudarlles a construír o seu proxecto persoal e profesional con maior seguridade.
