Vaia semana de Entroido que gozamos en Salesianos!
Ao longo de toda a semana fomos seguindo os mandatos do meco: calcetíns por encima do pantalón, unha peza do revés, un zapato de cada cor, medio pixama… E finalizamos a semana, vindo disfrazados de momentos de historia.
O venres, foi un día de festa e aprendizaxe compartida. Comezamos cun tempo de aula, onde coñecemos os Entroidos e personaxes dos distintos lugares de Galicia: Cigarróns de Verín, Boteiros de Viana do Bolo, Xenerais do Ulla, Madamas e Galáns, Peliqueiros de Laza, Papagaio Ravachol e Pantallas de Xinzo.
A continuación, tivemos a merenda compartida, onde puidemos gozar dos doces típicos de Entroido: orellas, filloas, roscas, flores…
Xa coas barrigas cheas, chegou o momento de desfile por cursos coa música que escollemos para a ocasión. Foi o momento de poder vernos todos e gozar dos disfraces e alegría dos compañeiros.
Para finalizar a mañá, chegou o momento de xogar xuntos. Tivemos unha rotación de 6 xogos relacionados cos personaxes de Entroido que traballamos anteriormente nas aulas. Encantounos compartir ese tempo xuntos.
Pola tarde, chegou un dos momentos máis esperados por todos. O momento de baile e festa, acompañado dos distintos premios que entregamos: á mellor parella, ao máis choqueiro, á mellor maquillaxe, ao mellor complemento e ao máis orixinal.
Finalizamos cansados a semana, pero con alegría e pilas cargadas para gozar dos días de Entroido. Feliz Entroido a todos/as!!
Aquí vos deixamos unha mostra dalgúns dos momentos vividos.
