Sentimos, por intuición e experiencia, que o noso “Somos futuro!”, estaba cargado de esperanza. Esperanza que agora nos chama a seren “PROTAGONISTAS DA HISTORIA”. Non hai vidas anónimas, senón que cada quen vive a súa historia, e a vive en grupo, en aula, en equipo, en comunidade, en familia… Esta crónica persoal, máis vivida que contada, é sempre ‘unha historia de salvación’. Con todos os nosos avances e retrocesos, coas nosas voltas e revoltas, coas nosas caídas e rexurdimentos, somos “PROTAGONISTAS DA HISTORIA”. O devir existencial do curso 2025-2026!

Trátase dunha nova oportunidade para aprender, medrar e deixar pegadas. É unha invitación para vivir cada día con conciencia, compromiso e valentía. Non somos simples espectadores do que ocorre ao noso redor. Somos actores principais, coa capacidade de transformar a realidade e escribir, cos nosos feitos e decisións, páxinas únicas e irrepetibles nunha historia persoal e colectiva. Todo isto implica preguntarse cada día: que podo achegar?, como podo mellorar este mundo?, de que forma podo deixar unha pegada positiva?

É verdade que existe a historia que se le nos libros, feita por personaxes irrepetibles… A nosa, non menos importante, técese no cotián: na palabra que anima, no xesto que consola, no esforzo por superar unha dificultade, no traballo en equipo, na escoita atenta, na solidariedade silenciosa… Todos e cada un, desde o noso lugar, somos esas persoas insubstituíbles e únicas que temos a posibilidade de marcar a diferenza. Por iso somos, sen a menor dúbida, “PROTAGONISTAS DA HISTORIA”, desas accións e xestos que son sempre ‘unha historia de salvación’.

E porque somos herdeiros da esperanza (“Somos futuro”!), o lema do presente curso quere espertar en nós a certeza de que aínda queda moito por facer, e que cada un ten algo esencial que aportar. Non estamos chamados a repetir o pasado, senón a construír un futuro diferente e novo. O noso futuro pasado, ten un esperanzador futuro. Somos “PROTAGONISTAS DA HISTORIA”.

Por iso chámasenos a fomentar a participación activa, o pensamento crítico, o compromiso social e a procura do ben común. Queremos educar persoas conscientes da súa historia e protagonistas do seu tempo, capaces de mirar ao mundo con esperanza e traballar con outros para transformalo. Somos convidados a “acoller, vivir e agasallar” unha crónica vital que chegará a ser marabillosa porque estamos chamados a “camiñar xuntos”, como “PROTAGONISTAS DA HISTORIA”.

Curso 2025-2026! Un reclamo esixente para vivir a historia, para ser parte activa dela, para escribila. Porque cada un de nós é protagonista dunha vida que paga a pena ser contada, porque é unha historia irrepetible e única da que nós somos protagonistas. Iniciamos a aventura; comezamos ‘esta historia de salvación’.